Ársþing HSÞ – Þórarinn Ragnarsson er íþróttamaður HSÞ 2018

Ársþing HSÞ fór fram í Skjólbrekku í Mývatnssveit í gær sunnudag. 60 þingfulltrúar frá 19 aðildarfélögum HSÞ mættu á þingið, auk gesta frá ÍSÍ og UMFÍ. Viðar Sigurjónsson frá ÍSÍ heiðraði tvo einstaklinga fyrir vel unnin störf í gegnum tíðina. Jón Friðrik Benónýssonfékk gullmerki ÍSÍ og Kristján Stefánsson Mývetningi fékk silfurmerki ÍSÍ.

Viðar Sigurjónsson afhendir Jóni Friðriki Benónýssyni gullmerki ÍSÍ

Jón Friðrik Benónýsson eða Brói eins og hann er jafnan kallaður hefur verið viðloðandi frjálsíþróttastarf hjá HSÞ nánast samfleytt í meira en hálfa öld. Á sínum yngri árum var Brói lykilmaður í frjálsíþróttaliði HSÞ og fór svo seinna að þjálfa frjálsíþróttir bæði hjá einstökum félögum innan HSÞ sem og frjálsíþróttaráði HSÞ. Brói hefur verið aðalþjálfari sambandsins með stuttum hléum frá miðjum tíunda áratug síðustu aldar og allt fram á síðasta ár. Hann hefur sannarlega verið potturinn og pannan í frjálsíþróttastarfi HSÞ og átti t.a.m. mjög stóran þátt í enduruppbyggingu barna- og unglingastarfs hjá HSÞ í upphafi þessarar aldar, þjálfaði bæði hjá HSÞ og keyrði út í félögin til að þjálfa. Undir hans stjórn átti HSÞ lengi vel barna- og unglingalið í fremstu röð sem og frjálsíþróttamenn í fremstu röð. Brói hefur alla tíð sinnt sínu starfi af metnaði og fylgt sínum iðkendum um allar koppatrissur. Hann hefur reynst iðkendum sínum traust fyrirmynd sem þau bera virðingu fyrir og án hans er erfitt að sjá hvernig frjálsíþróttastarf innan HSÞ hefði verið. Þá hefur Brói verið öflugur liðsmaður leikdeildar Umf. Eflingar og tekið þátt í 20 leikverkum með Eflingu.

Viðar Sigurjónsson afhendir Kristjáni Stefánssyni silfurmerki ÍSÍ

Kristján Stefánsson er félagsmálamaður af gamla skólanum og hefur tekið þátt og starfað fyrir flest félög í Mývatnssveit í fjölda ára. Kristján hefur verið formaður Golfklúbbs Mývatnssveitar í 20 ár af þeim 30 sem klúbburinn hefur starfað og hefur haldið klúbbnum á lífi í mörg ár. Sem formaður hefur hann staðið fyrir uppbyggingu vallarins og umgjörðar hans. Ekki má gleyma viðhaldi vallarins sem er ekkert einfalt þar sem hann liggur í nálægt 300m hæð yfir sjávarmáli. Kristján hefur einnig starfað mikið fyrir Mývetning og þá sérstaklega er snýr að skíðaiðkun, en Kristján var einn af þeim sem tóku þátt í að koma skíðalyftunni upp í Kröflu, og eftir það að sjá um viðgerðir á lyftunni, troða brautir, keyra börn á æfingar og mót til fleiri ára.

Þó nokkur mál voru rædd og samþykkt á ársþinginu. Þar á meðal voru siðareglur fyrir HSÞ og aðildarfélög þess samþykktar. Viðbragðsáætlun og verklagsreglur HSÞ vegna aga-, eineltis-, ofbeldis- og kynferðisbrota voru einnig samþykktar. Stefna HSÞ varðandi verkefnið „Æfum alla æfi“ var samþykkt með orðalagsbreytingum. Tillaga um fækkun aðalmanna í stjórn HSÞ úr sjö í fimm var sömuleiðis samþykkt. Aðild Skotfélags Þórshafnar og nágrennis að HSÞ var samþykkt og einnig var samþykkt að Gólfklúbburinn Gljúfri fái fulla aðild að HSÞ á ný.

Tillaga stjórnar HSÞ um breytingar á skiptingu lottótekna var hinsvegar felld og einnig tillögur um breytingar á orðalagi reglugerðar um Fræðslusjóð HSÞ. Miklar umræður urðu um tillögu stjórnar HSÞ þess efnis að HSÞ fari með stjórn og starfsemi Umf. Gamans og alvöru og beri ábyrgð á eignum þess. Fór svo að tillagan var felld.

Jónas Egilsson verður áfram formaður HSÞ og með honum í stjórn sitja Stefán Jónasson, Selmdís Þráinsdóttir, Jón Sverrir Sigtryggson og Ásdís Inga Sigfúsdóttir.

Þórarinn Ragnarsson er íþróttamaður HSÞ 2018

Þórarinn Ragnarsson íþróttamaður HSÞ 2018

Kynnt var val á íþróttamönnum ársins í ýmsum greinum sem stundaðar eru á félagsvæði HSÞ og einn af þeim, Þórarinn Ragnarsson Hestamannafélaginu Snæfaxa, var valinn íþróttamaður HSÞ 2018. Hann var einnig valinn Hestamaður HSÞ 2018. Umsögn um Þórarinn má lesa hér fyrir neðan.

Þórarinn Ragnarsson er fæddur og uppalinn á Gunnarsstöðum í Þistilfirði árið 1989 og er menntaður reiðkennari frá Háskólanum á Hólum. Hann rekur hrossaræktarbúið Vesturkot ásamt unnustu sinni. Hann hefur verið að keppa í mörg ár með góðum árangri. Afrek Þórarins í hestaíþróttum árið 2018 var eftirfarandi:

Meistaradeildin í hestaíþróttum: 2. sæti í fimmgangi, 5. sæti í flugskeiði, 5. sæti í 150m skeiði, 7. sæti í tölti. Reykjavíkurmeistaramót: 6. sæti í tölti, 7.-8. sæti í fimmgangi. Opna íþróttamót Sleipnis: 4. sæti í fjórgangi. Landsmót hestamanna: 6. sæti í tölti. Íslandsmót: 2. sæti í fimmgangi, 5. sæti í fjórgangi, 7. sæti í tölti. Þá vann hann uppsveitadeildina með yfirburðum og eins 150m skeið á skeiðleikum.

Eftir árið 2018 er Þórarinn þriðji á Worldranking listanum í fimmgangi og efstur allra Íslendinga. Einnig sýndi Þórarinn nokkur kynbótahross árið 2018 með góðum árangri.

Íþróttamenn HSÞ í hinum ýmsu greinum og umsagnir um þá.

Blak

Þórunn Harðardóttir – Völsungur

Þórunn hefur spilað blak með Völsungi í 11 ár. Hún er fyrirliði Meistaraflokks Völsungs sem spilar í Úrvalsdeild Íslandsmótsins þriðja árið í röð þar sem gengi liðsins hefur tekið jöfnum og öruggum framförum og er liðið nú í 3 sæti úrvaldeildarinnar þegar tímabilið 2018-19 er hálfnað. Þórunn er mjög öflugur leikmaður sem leggur sig ávallt 100% fram bæði á æfingum og í keppni. Hún er jákvæð, hjálpsöm og yfirveguð og er frábær fyrirmynd yngri leikmanna sem eru að stíga sín fyrstu skref í meistaraflokki.

Boccia

Ásgrímur Sigurðsson – Völsungur

Ásgrímur er öflugur bocciaspilari, hann hefur æft og spilað með Völsungi til fjölda ára. Dugnaður, ástundun og áhugi með einsdæmum, en öll árin hefur hann mætt nánast á allar æfingar þó hann þurfi að sækja æfingar um 150 km leið.

Árið 2018 var Ásgrími gott „Bocciaár“ eins og mörg undanfarin ár og keppti hann á öllum mótum ársins, á Íslandsmótum bæði í einstaklings og liðakeppni, keppti hann í 1. deild, þá keppti hann á Hængsmótinu á Akureyri. Á flestum þessum mótum komst hann í úrslit þó ekki ynni hann til verðlauna. Ásgrímur var sveitinni sem vann Opna Húsavíkurmótið og titilinn „Húsavíkurmeistarar í boccia“ . Glæsilegur árangur hjá Ásgrími.

Bogfimi

Ásgeir Ingi Unnsteinsson – Umf. Efling

Ásgeir Ingi er tilnefndur sem bogfimimaður ársins 2018 og á hann það svo sannarlega skilið ef tekið er mið af árangri hans árið 2018, ungur og efnilegur maður hér á ferð. Ásgeir nýtti sér vel þær æfingar og aðstöðu sem buðust með Akureyringum árið 2018 og náði góðum árangri í kjölfarið. Ásgeir Ingi Unnsteinsson vann til gullverðlauna í sínum flokki (U21) á Íslandsmótunum bæði innan- og utanhúss, varð í 7. sæti á Aurora open og tók loks þátt á Norðurlandamóti ungmenna í haust þar sem hann hafnaði í 12. sæti.

Frjálsíþróttir

Halldór Tumi Ólason – Völsungur

Halldór Tumi eða Tumi eins og hann er oftast kallaður hefur æft frjálsar í þó nokkurn tíma. Hans aðal greinar eru 100m, 200m og langstökk. Hann sinnir æfingum af miklu kappi og hefur það verið að skila sér í miklum framförum á síðasta ári, þrátt fyrir að hafa glímt við smá meiðsli.

Helsti árangur Halldórs Tuma á árinu 2018 var eftirfarandi:
Á UFA móti í apríl varð Tumi í 3. sæti í langstökki og stökk 5,84 m. Á Gautaborgarleikunum í byrjun júlí var hann með persónulega bætingu í 200m og hljóp á 24,68 sek og vann sinn riðil. Á unglingalandsmótinu í ágúst varð hann í 8. sæti í 100m og hljóp á 12,48 sek og í 4.sæti í langstökki með stökk upp á 5,90 m. Á minningarmóti Ólivers á Akureyri varð hann í  1.sæti í langstökki með stökk upp á 6,33 m sem var persónuleg bæting en líka fjórða besta stökk á landinu í 16-17 ára flokki sem er mjög góður árangur. Hann keppti líka í 60m hlaupi þar sem hann var með persónulega bætingu og hljóp á 7,63 sek og lenti í 4. sæti. Síðasta mót ársins var svo Silfurleikar ÍR þar sem hann var með tvær persónulegar bætingar. Hann varð í 3. sæti í þrístökki með stökk upp á 12,30 m og í 6. sæti í 200m þar sem hann hljóp á 24,10 sek.

Glíma

Einar Eyþórsson – Mývetningur

Einar Eyþórsson er valinn glímumaður HSÞ 2018. Á árinu 2018 keppti Einar á eftirtöldum mótum með góðum árangri:

  • Bikarglíma Íslands: Bikarmeistari í -90 kg flokki, 3. sæti í opnum flokki
  • umferð í meistaramótaröðinni 2017-2018: 2. sæti í +90 kg, 3. sæti í opnum flokki
  • Meistaramótaröð 2017-2018 – úrslit: 2. sæti í +90 kg og 2. sæti í opnum flokki
  • Íslandsglíman: Grettisbeltið: 2. sæti
  • Fegurðarverðlaun á Íslandsglímunni: 1. sæti
  • Íslandsmeistaramótið í backhold: 6.-9. sæti í +90 kg og 3. Sæti í opnum flokki
  • Erlendar keppnir, Cowal hálandaleikarnir: 2. sætið í opnum flokki í Backhold og 2. sætið í  undir 15 steinum í Backhold.
Knattspyrna

Bjarki Baldvinsson – Völsungur

Meistaraflokkur karla náði góðum árangri í sumar er liðið hafnaði í fjórða sæti með 40 stig og voru í toppbaráttunni frá upphafi til enda. Bjarki Baldvinsson var fyrirliði liðsins og fór fyrir sínu liði með góðri spilamennsku. Lagði upp mörk fyrir félaga sína ásamt því að skora 5 sjálfur í 23 leikjum sínum í deild og bikarkeppni. Bjarki vakti ekki bara athygli hjá Völsungum og stuðningsfólki því hann var valinn í lið ársins á Fotbolti.net, þar sem fyrirliðar og þjálfarar sjá um kosningu.

Bjarki er leiðtogi innan og utan vallar og leggur mikið á sig til að bæta stöðugt leik sinn og lyfta þannig liði sínu á næsta stig. Góð fyrirmynd fyrir yngri leikmenn sem vilja bæta sig og ná lengra.

Skák

Tómas Veigar Sigurðarson – Skákfélagið Huginn

Tómas Veigar Sigurðarson er skákmaður HSÞ 2018. Tómas Veigar vann sigur á skákþingi félagsins í febrúar, eftir að hafa unnið undanriðilinn með öruggum hætti. Hann varð efstur félagsmenna á Skákþingi Norðlendinga 2018 og stóð sig afar vel á Íslandsmótinu 2018-19 fyrir hönd félagsins. Það fer því vel á því að Tómas sé skákmaður HSÞ, en þetta er annað árið í röð sem Tómas Veigar er valinn sem skákmaður HSÞ.

Skotíþróttir

Kristján R. Arnarson – Skotfélag Húsavíkur

Kristján tók þátt í nokkrum mótum á árinu með ágætum árangri. Hann er m.a. Húsavíkurmeistari í BR50 og náði einnig góðum árangri á mótum á Akureyri. Eftirfarandi er árangur hans yfir árið:

Húsavíkurmeistari í BR50.
1 sæti í BR50 móti í mars
3 sæti VFS mót í mars
8 sæti grúppumót
3 sæti 100 mtr VFS mót 16.5
4 sæti 200 mtr VFS mót 16.5
1 sæti Akureyri sumarmot BR50
5 sæti Akureyri hreindýramót, Best á skor á 200mtr.
6 sæti Akureyri breyttur rifflar páskamót
4 sæti Akureyri  óbreyttir rifflar páskamót
6 sæti Akureyri þrístöðumót veiðirifflar
1 sæti Akureyri  VFS mót

Hvatningarverðlaun hlaut Erla Rós Ólafsdóttir frá Þórshöfn.

Í umsögn um hana segir m.a. að síðustu þrjú ár hafi hún orðið Íslandsmeistari í spjótkasti á nánast öllum mótum sem hún hafi keppt á. Erla varð í þriðja sæti á Gautborgarleiknum í í Svíþjóð í spjótkasti. Hún varð unglingalandsmótsmeistari í spjótkasti þriðja árið í röð á árinu 2018. Erla er metnaðargjörn og ákveðin í að standa sig vel í þessari grein.

Jónas Egilsson form. HSÞ. Mynd: Sigurbjörn Ásmundsson
Þingfulltrúar í Skjólbrekku. Mynd: Sigurbjörn Ásmundsson
Brói og Viðar. Mynd: Sigurbjörn Ásmundsson

Fræðslusjóður HSÞ

Stjórn HSÞ auglýsir eftir umsóknum um styrk úr Fræðslusjóði HSÞ.
Rétt til að sækja í sjóðinn hafa eingöngu félagar í aðildarfélögum HSÞ.

Umsóknarfrestur er til 15. apríl 2017

Umsóknir sendist á skrifstofu HSÞ;  hsth@hsth.is

 

Tilgangur sjóðsins er að auka menntun og þekkingu félaga innan HSÞ á íþróttagreinum, þjálfun, í félagsmálum og félagsstarfi – með því að sækja t.d. námskeið, fundi eða ráðstefnur.

Nánar um Fræðslusjóð má finna á heimasíðunni (hsth.is) undir „Stjórn HSÞ“ / sjóðir og styrkir.  Þar má einnig finna umsóknareyðublað.

Ársþing HSÞ – Thelma Dögg valin íþróttamaður HSÞ 2016

Ársþing HSÞ var haldið í Stórutjarnaskóla í dag. 55 fulltrúar frá 16 aðildarfélögum HSÞ mættu til þingsins. Aníta Karin Guttesen formaður HSÞ setti þingið og flutti skýrslu stjórnar. Fulltrúar frá UMFÍ og ÍSÍ heiðruðu félaga í HSÞ fyrir vel unnin störf í gegnum tíðina. Íþróttafólki úr héraði voru veittar viðurkenningar fyrir góðan árangur í hinum ýmsu íþróttagreinum og kjöri íþróttamanns HSÞ 2015 var lýst.

Thelma Dögg Tómasdóttir hestamannafélaginu Grana var valin Íþróttamaður HSÞ 2016 fyrir góða árangur í hestaíþróttum á árinu.

Thelma Dögg Tómasdóttir

Árangur hennar á árinu 2016 er eftirfarandi

 1-2 sæti nýárstölt Léttis

Kea mótaröð
Fjórgangur                   2 sæti
Tölt                      5 sæti
Fimmgangur      1 sæti
Slaktaumatölt     4 sæti

Líflandsmót
Tölt                      2 sæti
Fjórgangur                   2 sæti
Fimmgangur      2 sæti

Vormót Léttis
Fjórgangur                   4 sæti
Tölt                      2 sæti
Slaktaumatölt     5 sæti (fullorðinsflokk)
Fimmgangur      2 sæti (fullorðinsflokk)

Landsmót 2016
A úrslit 6 sæti

Íslandsmót 2016
Fjórgangur                   16 sæti
Tölt                      3 sæti (b-úrslit)
Fimmgangur      7 sæti (a-úrslit)
Slaktaumatölt     6 sæti (a-úrslit)

Reykjavík Ridercup
Fimmgangur                13 sæti

Youth cup í Hollandi
Fimmgangur                2 sæti
Gæðingaskeið             7 sæti
Flac race                      útslit
(Valin voru 9 íslensk ungmenni til þess að fara sem fulltrúar islands)

Suðurlandsmót
Gæðingaskeið             5 sæti
100 metra skeið          7 sæti

Einnig má taka fram að Thelma Dögg hefur verið valin í afrekshóp Landsambands hestamanna. Afi Thelmu Daggar, Jón Helgi Jóhannesson, tók við verðlaunabikarnum fyrir hönd Thelmu þar sem hún var að keppa á hestamóti í Reykjavík.

Jón Helgi Jóhannesson og Aníta Karin Guttesen

Ingi Þór Ágústsson frá ÍSÍ ávarpaði þingið og heiðraði Birnu Davíðsdóttur Bjarma, með silfurmerki ÍSÍ fyrir vel unnin störf.  Gunnar Gunnarsson frá UMFÍ ávarpaði þingið einnig og heiðraði Helen Jónsdóttir Bjarma og Kristján I jóhannesson Bjarma með starfsmerki UMFÍ fyrir vel unnin störf í gegnum tíðina. Birna tók við starfsmerkinu fyrir hönd Kristjáns.

Aníta Karin Guttesen var endurkjörin formaður HSÞ til 1 árs.

Þó nokkrar breytingar voru samþykktar á ársþinginu á reglugerð Akstursjóðs HSÞ og einnig á reglugerð um Afreksmannasjóð HSÞ. Einnig var samþykkt að stofna sérstakt ungmennaráð HSÞ.

Íþróttafólk HSÞ 2016 og handhafar Hvatningarverðlauna HSÞ 2016

Hvatningarverðlaun HSÞ 2016 hlutu
Sund  –  Dagbjört Lilja Daníelsdóttir
Frjálsar íþróttir  –  Erla Rós Ólafsdóttir
Blak – Arney Kjartansdóttir
Hestaíþróttir –  Sigrún Högna Tómasdóttir
Íþróttafólk HSÞ 2016 eftir greinum
Frjálsíþróttamaður HSÞ     Unnar Þór Hlynsson
Skákmaður HSÞ                      Rúnar Ísleifsson
Glímumaður HSÞ                   Einar Eyþórsson
Skotmaður HSÞ                       Gylfi Sigurðsson
Knattspyrnumaður HSÞ     Dagbjört Ingvarsdóttir
Bocciamaður HSÞ                 Sylgja Rún Helgadóttir
Handboltamaður HSÞ        Sigurður Már Vilhjálmsson
Blakmaður HSÞ                      Jóna Björk Gunnarsdóttir
Bogfimimaður HSÞ              Guðmundur Smári Gunnarsson
Hestamaður HSÞ                   Thelma Dögg Tómasdóttir

Verðlaunagripir HSÞ 2016

Dagbjört Lilja Daníelsdóttir Hvatningarverðlaun í sundi

Arney Kjartansdóttir Hvatningarverðlaun í Blaki

Valgerður Sæmundsd. tekur við hvatningarverðlaunum í frjálsum fyrir hönd Erlu Rós Ólafsdóttur

Guðrún Kristinds. tekur við verðlaunum fyrir hönd Jónu K Gunnarsdóttur Blakmann HSÞ

Sylgja Rún Helgadóttir Bocciamaður HSÞ

Guðmundur Smári Gunnarsson Bogfimimaður HSÞ

Vilhjálmur Sigmundsson tekur við verðlaunum fyrir Haldboltamann HSÞ

Jón Helgi Jóhannsson tekur við verðlaunum vegna Hestamanns HSÞ

Einar Eyþórsson Glímumaður HSÞ

Dagbjört Ingvarsdóttir Knattspyrnumaður HSÞ

Unnar Þór Hlynsson Frjálsíþróttamaður HSÞ

Rúnar Ísleifsson Skákmaður HSÞ

Aðalbjörg Ívarsdóttir tekur við verðlaunum fyrir Gylfa Sigurðsson Skotmann HSÞ

Jón Helig Jóhannsson tekur við veðlaunum Thelmu Daggar Tómasdóttur sem var valin Íþróttamaður HSÞ 2016

Allir verðlaunahafa HSÞ 2016

 

Héraðsmótið í skák U-16 ára fer fram á morgun

Á morgun, miðvikudaginn 7. desember verður héraðsmót HSÞ í skák fyrir 16 ára og yngri, haldið í Seiglu – miðstöð sköpunar (áður Litlulaugaskóla) í Reykjadal. Mótið hefst kl 16:00 og tefldar verða 4-5 umferðir eftir monrad-kerfi og verður umhugsunartíminn 10 mín á keppanda í hverri skák. Umferðafjöldinn ræðst þó af endanlegri þátttöku, en 16 keppendur tóku þátt í mótinu 2015.hsth1

Sérstök verðlaun verða veitt fyrir þrjú efstu sætin í þremur aldursflokkum og sigurvergarinn í hverjum flokki fær nafnbótina héraðsmeistari HSÞ í skák 2016.

Keppt verður í eftirfarandi flokkum.

8 ára og yngri (1-3 bekkur)
9-12 ára (4-7 bekkur)
13-15 ára (8-10 bekkur)

Skráning í mótið fer fram hjá Hermanni í síma 4643187, 8213187 eða með tölvupósti á netfangið: Lyngbrekku@simnet.is.

Ókeypis verður í mótið. 

Í gær mánudag voru 11 keppendur þegar búnir að skrá sig til leiks í mótið, en mjög æskilegt að að keppendur skrái sig fyrir fram til leiks.

 

Baldvin Daði Ómarsson ráðinn framkvæmdastjóri HSÞ

Baldvin Daði Ómarsson hefur verið ráðinn sem nýr framkvæmdastjóri HSÞ frá 1. nóvember. Baldvin Daði er nýr á sviði íþróttahreyfingarinnar og hefur notað fyrstu vikurnar í að kynna sér starfsemi og sögu HSÞ, auk þess að flytja aðsetur skrifstofu HSÞ í nýja skrifstofu í Seiglu – miðstöð sköpunar á Laugum.

baldvin-dadi-omarsson
Baldvin Daði Ómarsson

Baldvin Daði hefur lokið námi af verk & raunvísindadeild Keilis, auk þess stundaði hann nám í Hátækniverkfræði við Háskólann í Reykjavík.

Baldvin hefur sinnt hinum ýmsu störfum í gegnum tíðina, en hann starfaði ma. sem sundlaugarvörður við sundlaugina á Laugum sl. tvö sumur

 

 

Ákveðið var að breyta um húsnæði á Húsavík í vor, en með uppsögn fráfarandi framkvæmdastjóra var ákveðið að bíða átekta með að finna nýtt húsnæði þar til ljóst yrði hvar á starfssvæði HSÞ nýr framkvæmdastjóri hefði aðsetur. Þar sem Baldvin Daði er búsettur á Akureyri og keyrir á milli, taldi hann heppilegast að starfa á Laugum, þar sem hann á fjölskyldu tengsl.

Baldvin Daði hefur þegar hafið störf á nýju skrifstofunni. Skrifstofa HSÞ verður opin á þriðjudögum og föstudögum frá kl 9:00-15:00 báða daganna.

Stjórn HSÞ býður Baldvin velkominn til starfa.

Stjórn HSÞ þakkar Elínu S. Harðardóttur fráfarandi framkvæmdastjóra fyrir vel unnin störf síðastliðinn 5 ár og óskar henni velfarnaðar á nýjum vettvangi.