Ársþing HSÞ – Kristbjörn íþróttamaður ársins – Aníta nýr formaður

Aníta Karin Guttesen Eflingu, var kjörinn nýr formaður HSÞ á ársþingi HSÞ sem fram fór í Skúlagarði sl. sunnuag. Aníta tekur við af Jóhönnu Kristjánssdóttur sem verið hefur formaður sl. 5 ár. 50 fulltrúar frá 18 aðildarfélögum HSÞ sátu þingið, auk gesta.  Kristbjörn Óskarsson Bocciamaður var kjörinn íþróttamaður HSÞ árið 2014.

Kristbjörn Óskarsson íþróttamaður HSÞ
Kristbjörn Óskarsson íþróttamaður HSÞ

Fjölmargar tillögur lágu fyrir þinginu og voru þær allar samþykktar. Margar þeirra breyttust talsvert í meðferð nefnda og þingheims.
ÍSÍ veitti tvær heiðursviðurkenningar á þinginu, Silfurmerki ÍSÍ fékk Torfhildur Guðrún Sigurðardóttir fyrir ötult starf til fjölmargra ára í þágu íþrótta og heilsu og Gullmerki ÍSÍ hlaut fráfarandi formaður, Jóhanna S. Kristjánsdóttir. Magnús Þorvaldsson, Jóhanna Kristjánsdóttir og Jón Þ Óskarsson voru sæmd starfsmerki UMFÍ. Íþróttafólk ársins 2014, úr hinum ýmsu greinum sem stundaðar eru innan HSÞ, voru einnig verðlaunuð á ársþinginu.

Íþróttamenn HSÞ 2014 eru.

Kristbjörn Óskarsson Bocciamaður HSÞ
Kristján Arnarson Skotfimimaður HSÞ
Tómas Gunnarsson Bogfimimaður HSÞ
Viðar Njáll Hákonarson Skákmaður HSÞ
Sif Heiðarsdóttir Sundmaður HSÞ
Dagbjört Ingvarsdóttir Frjálsíþróttamaður HSÞ
Einar Eyþórsson Glímumaður HSÞ
Berglind Kristjánsdóttir Knattspyrnumaður HSÞ

Hér fyrir neðan eru nokkrar myndir frá ársþinginu

2010-12-16 19.45.31
Jóhanna Kristjánsdóttir Geisla fráfarandi formaður HSÞ og Aníta Karin Guttesen Eflingu nýr formaður HSÞ

 

2010-12-16 17.17.15
Íþróttafólk HSÞ árið 2014
2010-12-16 15.25.41
Jóhanna Kristjánsdóttir Geisla var sæmd gullmerki ÍSÍ. Viðar Sigurjónsson frá ÍSÍ sæmdi Jóhönnu því. Jóhanna var einnig sæmd starfsmerki UMFÍ
2010-12-16 15.23.35
Torfhildur Sigurðardóttir Bjarma var sæmd starfsmerki ÍSÍ
2010-12-16 15.06.42
Magnús Þorvaldsson Völsungi var sæmdur starfsmekri UMFÍ. Kristján Þór Magnússon sonur Magnúsar tók við því fyrir hönd föður síns.
2010-12-16 15.03.39
Séð yfir salinn í Skúlagarði
2010-12-16 19.41.42
Ný kjörin formaður HSÞ, Aníta Karin Guttesen Eflingu, sleit þinginu.

Ársþing HSÞ fer fram á sunnudag í Skúlagarði

Ársþing HSÞ fer fram í Skúlagarði í Kelduhverfi sunnudaginn 15. mars og hefst það stundvíslega kl 10:00. Auk venjulegra ársþingsstarfa verða íþróttamenn heiðraðir fyrir hinar ýmsu íþróttagreinar sem stundaðar eru innan HSÞ og úr þeim hópi verður tilkynnt hver hefur verið valinn íþróttamaður HSÞ 2014.

HSÞ

Rétt til setu á þinginu hafa 84 þingfulltrúar frá 31 aðildarfélagi innan HSÞ.

Minnt er á að mæting á ársþing er lykillinn að því að aðildarfélag fái greiðslur úr lottó-tekjum HSÞ, samkvæmt lottóreglum HSÞ.

 

Aðalfundur Frjálsíþróttaráðs HSÞ 5. mars kl. 20:00 á Grænatorgi

 

Fundurinn verður haldinn fimmtudaginn 5. mars n.k. á Grænatorgi í HSÞÍþróttahöllinni á Húsavík kl. 20:00

Á dagskrá eru venjubundin aðalfundarstörf og kosning stjórnar ráðsins.  Aðeins kjörnir fulltrúar aðildarfélaga HSÞ hafa atkvæðis-rétt á fundinum, en allir eru þó velkomnir sem áhuga hafa á frjálsíþróttastarfi í héraði HSÞ.

Með von um að sjá ykkur sem flest
Fyrir hönd frjálsíþróttaráðs HSÞ,
Hulda E. Skarphéðinsdóttir, formaður

Æfingabúðir á Þórshöfn

Frjálsíþróttaráð HSÞ stóð fyrir sólarhrings æfingabúðum í frjálsum íþróttum  á Þórshöfn dagana 16.-17. janúar.  Við vorum 9 sem  lögðum  af stað frá Laugum með bíl frá Fjallasýn, 5 bættust við á Húsavík og 2 i Kelduhverfi. Ferðin austur gekk vel og fengum við góðar móttökur á Þórshöfn. Á Þórshöfn er stórt og mikið íþróttahús sem við fengum afnot af en gistingin var í félagsheimilinu sem er rétt við íþróttahúsið. Fyrsta æfingin var kl. 17 og voru það Bjargey, Hlynur, Eyþór og  Unnar elstu iðkendur okkar sem sáu um þá æfingu í fjarveru Bróa. Mætingin var mjög góð en 43 einstaklingar voru í allt mættir.  Eftir æfingu skelltu krakkarnir  sér í   sund, ísbað og heitan pott áður en farið var að borða. Ísfélagið á Þórshöfn og frjálsíþróttaráð buðu upp á pizzu og UMFL bauð upp á gos með. Eftir mikla pizzu veislu  var kvöldvaka.  Farið var í spurningakeppni, sýnd voru ýmiss frumsamin skemmtiatriði og svo var frjáls tími. ULMF bauð líka upp á popp á kvöldvökunni.  Um 30 manns gistu í félagsheimilinu, bæði  gestir og heimamenn.

Þórshöfn 3

Klukkan níu á laugardagsmorgunn var morgumatur en nauðsynlegt er að borða vel og ekki rétt fyrir æfingu.  Iðkendur skelltu sér í fótbolta fyrir æfingu og var skipt í lið heimamenn á móti gestum.  Heimamenn unnu.  Fyrri æfing dagsins var kl. 10  og var Brói þjálfari þá mættur á Þórshöfn.   Brói  lék við hvern sinn fingur enda taldi hann sig ekki hafa haft svona marga á æfingu í 20-30 ár.  Það var glatt á hjalla og ýmsar  æfingar í boði.  Brói útskýrði vel tilgang æfinga og sagði að nauðsynlegt væri að gera alls konar æfingar til að samhæfa huga og líkama.  Kapítóla og Ásdís þjálfarar á Þórshöfn aðstoðuðu við þjálfun sem og foreldrar og aðrir  sjálfboðaliðar.   Eftir æfingu var borðað nesti og ávextir sem UMFL  gaf.  Hvíldartími tók við eftir mat sem var m.a. notaður í að ganga frá upp í félagsheimili.   En nauðsynlegt er líka að kunna að hvíla líkamann milli átaka.  Eitthvað fannst krökkunum  þó hvíldartíminn vera langur og voru þau fljótlega farin í feluleik og svo í fótbolta aftur.  Þá  unnu gestir.    Í upphafi seinni æfingar var tekinn hópmynd.  Brói lét krakkana fara í hraðaaukningar, drillur og styrktaræfingar.  Minnti á að nota vel hendur til að halda jafnvægi.   Eftir góðar teygjur í lok æfingar  fóru krakkarnir svo í sund eftir æfingu.   Áður en við fórum heim var reynt að klára nesti, og ávexti.

Þórshöfn 4

Óhætt er að segja að allt hafi gengið upp þennan sólarhring.  Iðkendur eiga hrós skilið fyrir frábæra frammistöðu  hvort sem var á æfingum eða utan vallar.  Ævinlega kurteis og prúð.  Það var reglulega gaman að sjá alla þessa hæfileikaríku krakka saman og vonandi sjáum við til þeirra flestra í framtíðinni.

En af hverju erum við að hafa svona æfingabúðir?  Jú það er nauðsynlegt að brydda upp á ýmsum uppákomum fyrir iðkendur.  Starfssvæði  HSÞ er stórt og æfðar eru frjálsar íþróttir  á þremur stöðum á svæðinu.  Það er gaman fyrir krakkana að hittast og kynnast  líka utan æfinga og keppni.

Þökkum UMFL kærlega fyrir góðar móttökur og gott skipulag.

Dagatal frjálsíþróttaráðs kemur úr prentun í vikulok.  Það er von okkar að sem flestir sjái sér fært að greiða  fyrir dagatalið og styrkja þannig iðkendur okkar.  Fram undan eru fjölmörg íþróttamót og flest þeirra eru í Reykjavík.

Aldarafmælisrit HSÞ er komið út

Nú er loksins komin úr prentsmiðjunni aldarafmælisrit HSÞ sem inniheldur sögu Ungmennasambands Norður Þingeyinga, Héraðssambands Suður Þingeyinga og Héraðssambands Þingeyinga. Skemmtileg bók með mikið af myndum úr starfinu.

HSÞ forsíða

Bókina er hægt að kaupa í Bókaverslun Þórarins á Húsavík, Selinu í Mýnatnssveit, Dalakofanum á Laugum, hjá Birni Ingólfssyni á Grenivík, Skerjakollunni á Kópaskeri, versluninni á Raufarhöfn íþróttahúsinu á Þórshöfn. Bókin er til sölu á skrifstofu HSÞ með því að senda línur á hsth@hsth.is. Bókin kostar kr. 4000,- í beinni sölu frá HSÞ.  Sendum um allt land.

HSÞ baksíða
Hverju eintaki fylgir falleg lyklakippa með merki Héraðssambands Þingeyinga.