Aðildarfélög HSÞ eru í heildina 24 talsins en sambandssvæði HSÞ nær yfir fimm sveitarfélög frá Langanesbyggði í austri að Grýtubakkahreppi í vestri. Þrettán aðildarfélaga HSÞ eru sérgreinafélög og ellefu félaganna eru fjölgreinafélög.

Þær greinar sem hafa jafnan verið í boði hjá aðildarfélögum HSÞ eru:  Knattspyrna, hestaíþróttir, skák, golf, blak, frjálsíþróttir, skotíþróttir, fimleikar, íþróttir fatlaðra, mótorhjóla- og snjósleðaíþróttir, sund, taekwondo, skíðaíþróttir, bogfimi, glíma, bogfimi, almenningsíþróttir auk skipulagðs félagsstarfs s.s. leiklistar. Þá hafa félögin boðið upp á fleiri íþróttagreinar s.s. klifur, handbolta, körfubolta, borðtennis og pílukast.

Breytingar á aðildarfélögum

Frá stofnun HSÞ árið 1914 hafa fjöldamörg félög verið hluti af sambandinu.

Þannig má lesa í bókinni HSÞ 100 ára 1914-2014 að eftirfarandi félög hafi um tíma verið innan vébanda HSÞ á fyrstu 50 árum þess: Umf. Æskan, Svalbarðsströnd, Umf Bifröst í Höfðahverfi, Umf. Glæðir í Fnjóskadal, Umf. Framsókn í Flatey, Umf. Laugaskóla, Umf. Ófeigur í Skörðum á Húsavík, Umf. Víðir í Bárðadal og Íþróttafélag Reykdæla. Að auki voru félögin Ungmennafélag Fjöllunga, Ungmennafélag Núpsveitunga og Ungmennafélagið Neisti á Vestur-Sléttu og Skotfélagið Skotöx innan vébanda UNÞ. UMFN og Neisti sameinuðust undir nafninu Umf. Snörtur árið 1974.

Fleiri félög hafa verið innan HSÞ sem hafa ekki aðild lengur og hafa nokkrar breytingar orðið á félagaflórunni frá því um aldamótin:

• Umf. Ljótur í Laxárdal, stofnað 1915, var í sambandinu fram til um 1998-1999.
• Íþróttafélagið Eilífur og Ungmennafélagið Mývetningur (1909) sameinuðust árið 2002 í Mývetning íþrótta- og ungmennafélag.
• Boltafélag Húsavíkur, stofnað 2004, var óvirkt frá 2006 og loks skráð úr HSÞ 2019.
• Íþróttafélag Laugaskóla, stofnað 1989, var óvirkt frá 2012 og skráð úr HSÞ 2019.
• Ungmennafélagið Reykhverfingur, stofnað 1907, var óvirkt frá 2007 og skráð úr HSÞ 2021.
• Skákfélagið Huginn, stofnað 2014, var skráð út HSÞ 2021. Huginn varð til í kjölfar nokkurra sameininga. Árið 2012 sameinuðust Goðinn og Taflfélagið Mátar í Goðinn-Máta sem aftur sameinaðist Helli í GM-Helli árið 2013 og loks var gerð nafnabreyting og Huginn stofnaður árið 2014.
• Golfklúbburinn Hvammur á Grenivík var stofnaður 2003. Klúbburinn hætti starfsemi árið 2021 og var skráður úr HSÞ á ársþingi 2022.
• Ungmennafélagið Afturelding, stofnað 1923, var óvirkt frá 2012 og skráð úr HSÞ á ársþingi 2023.
• Ungmenna- og íþróttafélag Bakkafjarðar, stofnað 1994 og tilheyrði UÍA til 2010 er það kom til HSÞ vegna sameininga sveitarfélaga, var óvirkt frá 2004 og skráð úr HSÞ á ársþingi 2023.
• Ungmennafélagið Gaman og alvara, stofnað 1905, óvirkt frá 2018 og skráð úr HSÞ á ársþingi 2023.
• Ungmennafélagið Snörtur, stofnað 1974 við sameiningu Umf. Núpsveitunga og Umf. Neista, óvirkt frá 2016 og skráð úr HSÞ á ársþingi 2023.
• Ungmennafélag Tjörnesinga, stofnað 1909, óvirkt frá 2013 og skráð úr HSÞ á ársþingi 2023.
• Ungmennafélag Öxfirðinga, stofnað 1907, óvirkt frá 2016 og skráð úr HSÞ á ársþingi 2023.